Sveitarstjórnarkosningar eru að mörgu leyti uppskeruhátíð, þar sem kjósendur fá að segja sína skoðun á því sem unnið hefur verið að á kjörtímabilinu og hverjum þeir treysta til þess að stjórna sveitarfélaginu á næsta kjörtímabili.
Þegar  Bein leið var stofnuð blés ekki byrlega fyrir sveitarfélaginu okkar og lyfta þurfti grettistaki til þess að koma því á réttan kjöl á nýjan leik.
Bein leið skoraðist ekki undan og hefur alveg frá upphafi tekið þátt í fjárhagslegri endurreisn sveitarfélagsins í meirihlutasamstarfi. 

 

Margt hefur áunnist á kjörtímabilinu og vil ég nefna nokkur atriði sem staðfesta góðan árangur:

 

• Samkomulag við ríkið um byggingu nýrrar heilsugæslustöðvar annars vegar og nýs hjúkrunarheimilis hins vegar í Reykjanesbæ 

• Ný menntastefna „Með opnum hug og gleði í hjarta“ sem hefur vakið athygli út fyrir landsteinana fyrir framsækni og nýja nálgun.

• Bygging Stapaskóla 

• Nýsköpunar- og þróunarsjóður Fræðslusviðs settur á fót sem veitir árlega styrki til 20 nýsköpunar- og þróunarverkefna í leik- og grunnskólum Reykjanesbæjar

• Systkinaafsláttur á skólamáltíðir frá árinu 2020 sem er þannig útfærður að ekkert heimili þarf að greiða með fleiri en tveimur börnum. Með því er komið til móts við barnmargar fjölskyldur

• Afsláttur á gjöldum fyrir foreldra fjölbura hjá dagforeldrum

• Stigvaxandi hækkun á Hvatagreiðslum sem auðveldar börnum að taka þátt í fjölbreyttu íþrótta- og tómstundastarfi

• Stækkun á Öspinni um helming til að sinna sérstækum námsúrræðum fyrir börn með miklar stuðningsþarfir

• Stuðningur við starfsfólk í réttindanámi í leik- og grunnskólum

• Fagháskólanám í leikskólakennarafræðum í samstarfi við Menntavísindasvið HÍ, Keili og sveitarfélögin á Suðurnesjum

• Endurnýjun útisvæðis og ný glæsileg vatnsrennibraut í Sundmiðstöðinni

• Nýr og glæsilegur gervigrasvöllur vestan Reykjaneshallar

• Aðstaða fyrir bardagaíþróttir á Smiðjuvöllum 

• Aðstaða fyrir nýtt borðtennisfélag Reykjanesbæjar í gömlu slökkvistöðinni sem og inniaðstaða fyrir Golfklúbb Suðurnesja

• Tímamóta samstarfssamningar við stóru íþróttafélögin Keflavík og Njarðvík sem gera þeim enn betur kleift að standa undir mikilvægu forvarnar- og uppeldisstarfi sem og öflugu afreksstarfi

• Endurskipulagning Velferðarsviðs til að auka skilvirkni og bæta þjónustu

• Lagðir margir kílómetrar af Heilsustígum

• Allar fasteignir keyptar af Fasteign hf. og skólabyggingar ásamt Hljómahöll komnar í eigu sveitarfélagsins á nýjan leik

• Umhverfismálin sett á dagskrá með nýrri umhverfis- og loftslagsstefnu ásamt aðgerðaráætlun og innleiðingu Heimsmarkmiða Sameinuð þjóðanna.

 

Þetta og margt margt fleira hefur áunnist á kjörtímatímabilinu þrátt fyrir að staðið hafi verið frammi fyrir stórum áskorunum vegna atvinnuleysis í kjölfar falls WOW air og heimsfaraldurs. 

Bein leið gefur kost á sér til áframhaldandi góðra verka með hópi einstaklinga sem hefur bæði  þekkingu og reynslu til þess að leiða Reykjanesbæ fram veginn.
Nýtum okkur þá reynslu og setjum X við Y á kjördag. 

 

Guðbrandur Einarsson

Fráfarandi oddviti Beinnar leiðar og alþingismaður